Молитва кон Господа

Господи Боже, Создателу на човекот и небесен Оче, Ти си го установил и благословил бракот кога си рекол: Раѓајте се и множете се и наполнете ја земјата. Ти си го благословил и нашиот брак и си ни дал чеда, за да ја засилиш радоста на нашиот дом. Нема крај на Твојата милост кон нас и ние, смирените Твои чеда, Ти благодариме од сè срце. Нашите деца се дар од Тебе, Господи, зашто Ти си наш небесен Отец. Од сè срце Те молиме да ги примиш нашите деца под Твојата моќна закрила и да им го вардиш духот и телото како Твое наследство. Дарувај им добро здравје, чувај ги од болести и од секаква несреќа. Поткрепувај ги да растат далеку од секакви страдања и да му се радуваат на животот. Дарувај им го особено Твојот свет благослов, за да бидат сочувани од искушенијата и стапиците на лошиот и лажен свет. Вдахни им го Твојот Свет Дух, та секогаш да ја извршуваат Твојата света волја и да се поучуваат во Твојот закон. Сочувај ги од грев, од лоши другари, од соблазителни книги и од сите гревовни искушенија. Дај им сили да растат во мудрост, да напредуваат во добродетелен живот, да не ослабува нивниот синовски страв пред Тебе и да ги слушаат нашите добри родителски совети и упатства; со внимание да ги слушаат сите поуки за извршување на Твојата света волја, да бидат предани и послушни чеда на Твојата Света Црква. Дај ни и нам, Господи, да бидеме, и со дела, и со зборови учители на вистината и доброто, да бидеме нивни учители на вистинската вера уште од најраните денови на нивното детство. Тебе Ти ги предаваме и на Твојата добрина и милосрдие, на Твојата крепка заштита и помош. Прими ги и нив, прими нè и нас да бидеме секогаш Твои и со благодарни срца непрестано да Те прославуваме, да ја прославуваме Твојата неизмерна добрина и Твојата спасителна промисла. Амин.